Древлебиблиотека / Библиотека / Старообрядчество / Раннее старообрядчество / Диакон Феодор. Послание ко всем православным об антихристе

Послание ко всем православным об антихристе

Послание Феодора Диакона, еже имать сказание по писаниих о антихристе, когда явится и где быти ему. Тут же и о пророцех Ильи и Еносе и Богослове Иоанне, и вкратце о истинных законех церковных и о имени Iсусове, и о кресте тричастном и двоесложном, и от коего колена антихрист будет

Неключимый раб Пресвятыя и животворящия. неразделимыя Троицы, Отца и Сына и Святаго Духа, единаго и истиннаго Бога, юзник по вере, церкви Христове, возлюбленным святым братиям, сионским чадом, всем православным христианом афеторосийскаго рода, радоватися и утверждатися, вкупе же и здравствовати в непорочней вере Спасителя нашего Господа Исуса Христа, Сына Вожия, и воспитоватися и возрастати во святых благочестивых отеческих догматех кроме всякия еретическия скверны и порока.

Да вопрашивают нас нецыи от вас о словеси избраннаго сосуда Христова Павла Апостола, еже к Солуняном глаголет, благовествуя, во втором послании вторыя главы, об антихристе, сие: Да никтоже вас, рече, прелстит ни по единому образу, яко аще не приидет отступление прежде, и открыется человек греха, сын погибели, противник(2Фес 2:3) и проч. И аз отвещаю по дарованию Святаго Духа, елика дадемися. Тогда, при Апостоле, процвете Христова вера в Селуне от сих проповедников истинных Христовых, и диавол воздвиг своих не-киих безчинников и льстецев развратных, якоже и зде окрест Костромы и Павлова Перевоза, о нихже глаголете многая, блядуще, лживая и нечестивая учения диаволя, — гадко и слышати нам. И тако они селуняне обхождаху братию и прельщаху, глаголюще, яко уже пришествию Христову второму наставшу, и слышащих ужасаху и смущаху, и Павла Апостола облыгающе тем, сказующе, яко от него слышаще, еще же и от Духа глаголюще сицевая слышати, яко Христос грядет уже на суд. 0, сатанина духа прелести! Утро благочестия токмо нача светати еще по вселенней, a сатанин дух сказуя слепым, глаголя: солнце уже на западе! Сие уведав Апостол, от Рима посла к ниы в Селунь послание сие, моля их, глаголя, чтобы не внимали прелестником, глаголющим, яко настоит уже день Христов. Отнюдь, рече, не будет пришествия Христова на суд, дондеже проповесться благовестие Христово по вселенней всем языком, и потом по временам будет, рече, отступление от веры во всех языцех, и потом открыется в мире человек беззакония, еже есть противник, враг Богу, антихрист, и быши ему, рече, во свое время, тайна убо уже деется беззакония, сиречь Апостоли Христови сеяху благочестие по земли, а лживии апостоли диаволи злочестие свое, якоже бысть при них Симон волхв, Филиппа диакона крестник Николай отступник, Киноис и прочии. И до соборов тако все брася церковь Христова со враги, и между соборами и по соборех, и доныне Христова часть святое дело творит и действует Христовым духом, а антихристова часть свое тайное беззаконие деет в мире неприязненным духом. Чада Божия есть, по Иоанну Богослову, и чада неприязненная. Ктому рече Павел: тайна уже деется беззакония, точию держай ныне, дондеже от среды будет. Сие о Римской власти рече, в Риме бо писа. И тогда явится беззаконный, егоже Господь убиет духом уст своих и упразднит явлением пришествия своего: егоже есть пришествие по действу сатанину во знамениях и чудесех ложних, и прочея(2Фес 2:7-9). И священный Златоуст и благоумный Ипполит согласно вещают, яко римская держава и власть от антихриста разорится, и тамо быти ему во Иерусалиме, а не зде, — не смущайтеся, братие! Иаков жидовин пишет в своей книге, яко по престатии царства греческаго быти десяти рогом антихристовым, — десять царей вкупе будут со антихристом, роги цари суть. И паче Иакова Иоанн Богослов во Откровении пишет (Апокал. гл. 17). Ангел толкова ему о блуднице, седящей на звери красном, иже имать глав 7 и рогов 10. Теже десять рогов. сиречь царей, соберутся, и прелюбодейцу возненавидят и разорят, и власть свою и силу дадут антихристу, и поклонятся ему вси купно со Иудой, и возвеличат его и великим царем нарекут себе, и во Иерусалиме престол ему велий устроят, идеже прежде жидовския цари были великия, и он царство их обновит, и вознесется окаянный, и богом себя назовет, и ту великих свидетелей, Илию, и Еноха, и Иоанна Богослова убиет, идеже Господь наш распят бысть(Апокал. гл. 11). A о Богослове в Книге о вере пишет, яко вкупе и Богослов антихриста обличати будет со Илиею и Енохом. И Ипполит пишет в слове своем о Богослове, яко быти ему с нимиже.

И самого еще антихриста ныне несть, не видим и не слышим, — не ужасайтеся; предотечи же его быша мнози, и ныне есть, и по сих еще инии будут до сына погибельнаго. И ждите того, егда станет римская власть разорятися: но обстоим будет Рим вои отвсюду, и тогда разумейте, яко приближися запустение ему и антихристово царство прииде. По Ипполиту и Златоусту, Божию и человеческую власть содержит ныне папа римский, сиречь обема начальствы владеет, и духовным и градским; а не о Никоне здешнем то писание збысться, но о римском папежи; а не антихрист сам Никон, но предотеча его ближний, и последующии ему предотечи суть.

А еже по временам, отступление прежде приидет, по Павлову глаголу к селунянам; и о том числе зверином указует, еже есть 666, и о сем добре протолковано в Книге о вере печати московской. И богом того непщите, и о себе ничего не мудрствуйте. Горе мудрым о себе, писание сказует. И вы того бойтеся, и не вся тщитеся собою испытовати, и продерзием зле толковати недоведомыя и закрытыя тайныя глаголы Вожия. Егда приидет коей вещи время, тогда ту тайну и открыет Христос и немудрым младенцам. Егда же не у время исполнися числу, тогда и премудрым и богословцем недоведомо бывает и закрыто Святым Духом: не вся бо ведят и святии богословцы. Вся бо Бог един весть; a святым своим коемуждо дает явление Духа на пользу, кой сосуд что может понести и не разбитися и не розсыпатися. О оном числе зверином прежде многих лет и до перваго отступления римскаго пиша святый Ипполит, славнейший отец и пастырь поднебесный, егоже Златоуст похваляет вельми в слове о лжеучителех: где бо, рече, Ипполит сладкий и благоумный. И той рече о числе том: не бо рече, опасно свем сего писания. И святый Андрей Неокессарийский толковал Апокалипсис, и егда дойде до числа того, и рече: сие бо время открыет. А егда тем тайнам прииде время, тогда благоверным познано бысть, и писанию предано; а в гибнущих и ныне покровенно есть, в нихже Бог века сего ослепи разумы неверных, по Апостолу Павлу.

A o трех царех, ихже убиет антихрист по воцарении своем, о них пишет Ипполит места сказуя, а лиц не указа. И ныве в вас, братие, толкуют нецыи о тех царех пестрообразно и отнюдь неподобно, да не реку и еретическо. Аще святый лиц не указа прежде времени, а онии всуе мятутся, и не дарованное им разумение восхищают, и мудрейши себя святых показуют, а не вемы, кто есмы. И иже 17 глав откровения Богословля, седмоглавие зверя, толкуют о патриарсех московских, и то толкование их ложно есть и блазненно. Молим таковых любовию Духа не мудрствовати паче, еже подобает мудрствовати, но мудрствовати в целомудрии, по Апостолу, якоже подаст Бог. Мы бо о себе, братие, не хощем ничтоже вам предавати и уставляти, и неподобно толковати паче Богом проданных нам святых и непорочных догмат древних отеческих, за нихже сподоби нас Христос пострадати до крови и знамения на нас явити дивная, о нихже не невесте. Непщую и не по нашему то достоинству есть, но вас ради избранных спасения, да и вы от ложных ересей не прельщени будете и, православия ризу на себе носяще и непорочну сохраньше, да не осуждени и не нази и не постыдни явитеся и со всеми святыми станете на страшнем суде Христове одесную Царя Славы, великаго Бога и Спаса нашего Исуса Христа. И несть мы новии законоучители и новых догмат уставщики, но православныя веры защитники, и по законех святых отец наших поборницы. стоим и побораем за непорочный символ веры, и за истинное сложение перстов во знамении крестном, и за трисвятую аллилуию, еже: аллилуиа, аллилуиа, слава тебе Боже, за Литургию старых Служебников, и за святое крещение по древним книгам, в нихже везде есть Исус, а Иисуса, разделеннаго имени, во всех книгах, что ныне есть в Русской земле, отнюдь несть, — известно испытах о сем вся книги от Владимирова крещения, и за сия вся страждем о Христе Исусе и умираем. Вем, яко вся свята суть и нескверна вышереченная мною. И за тричастный крест Христов подвизаемся, и двоесложнаго образа крестнаго не хулю и не отметаю, — обоя в церкви есть, и проображение и событие самой истины, тридревнаго креста Христова. И вы о всех сих, возлюбленная братия и отцы, православныя христиане, мужие и жены благочестивыя, подвизайтеся и умирайте: и с первыми мученики нетленныя венцы приимете от Христа. Бога, и безсмертную славу получите с ними и вечную радость. А еже глаголите о Никоне, бывшем патриарсе, иже святую церковь разодра и разврати, и сим расколом всю святорусскую землю возмути, рождьшася его от нечистыя девки татарки, и сего ради мните его самого антихриста быти: ни, братие, ни! Аще и тако суть рождься, о сем известно не всем и сам аз; но подобает и о вразе правду свидетельствовати. Татарове не Данова племени суть, но от Агари суть пошли и от сына ея Измаила, егоже роди Авраам от сея Агари рабыни своея, и сего ради татарове словут агаряне и измаильтяне; а антихрист будет от жидовскаго колена Данова, егоже роди Иаков-Израиль от Валлы Рахилины, и от сего колена Данова будет антихрист, а не от татарскаго рода. И антихрист будет царь, а не патриарх. Испытовайте писания с великим опаством и прочитайте с разумом и со вниманием прилежно, да не прельщени будете от лже-словесников и бабьих басней. Велия беда от неведения святых писаний раждается. От сего и ереси все, от сего и расколы церковныя, и мятежи и брани, и пагубы душевныя: не уведеша бо ниже уразумеша, во тьме ходят. И мой ответ вопрошающим сей есть.

А новыя книги ныне подобны онем, иже в пустыни чужд огнь принесшим в храм свидения Господня, имже Бога прогневаша и погибоша за сие: чуждий огнь огнь Господень не прият, и принесших погуби. Чтый да разумеет.

Да блюдитеся зело от ложных мудрований и своеумных, и вся искушающе доброе держите. От всякия злыя вещи огребайтеся, и пустых распрей и сваров бегайте. Сими злыми диавол в нас любовь разоряет, еже есть начало и конец всякому благу: исполнение бо закона любы есть. И молите о нас, братие, яко да избавимся от настоящаго сего века лукаваго, видим лице ваше. Благодать Господа нашего Исуса Христа со всеми вами. Аминь.

Источник: Субботин Н. И. Материалы для истории раскола за первое время его существования. Т.6. Историко и догматико-полемическия сочинения первых расколоучителей. Часть 3. Сочинения бывшаго Благовещенского собора диакона Федора Иванова. - Москва. - 1881, Стр. 261-268.

Содержание
None