user:
pass:

Феодор  (Иванов)

Список с эпистолии великих отцев и страдалцев, за святую соборную и апостольскую церковь. яже должно всякому о Христе живущему прочитати и творити, да угоден будет Богови. зане несть ничтоже зде лестно, но вся истинна имущим ум от Господа истиннаго, аминь

показать коды

Неключимый раб великаго Бога и Спаса нашего Исуса Христа, диякон Божиим даром нареченный от святаго крещения Феодор. По милости Исус Христове, брату верному о Господе благодати тезоименитому Иоанну. Присно чаду восточныя святыя церкви радоватися, и здравствовати в вере православной. юже на основании Исус Христове, святии апостоли положиша в Сионе, и богоноснии отцы седьми вселенских соборов, и девяти поместных утвердиша Святым Духом. и всем верным братиям благодать и мир от Начальника веры и совершителя Исуса.

Стойте возлюбленнии мужайтеся и утвержайтеся, и не поступнии бывайте во отеческих преданиих. да с ними наследите вечно царство в горнем Иеросалиме. А еже писал еси брате, и молих отца своего святителя Христова, и прочих с ним святых отец страдальцев подвизающихся до смерти, за церковь Христову вкупе, о укреплении святых правил, и приписании руки к ним. на подтвержение гонимой церкви от антихристова воинства, и то прошение твое о Христе исполнися. А о горьких бедах належащих на нас не скорбите. Вси бо хотящии благочестно жити о Христе Исусе гоними будут. лукавии человецы и чародеи преуспеют на горшая. прельщающе и прельщаеми. глаголет апостол Павел сосуд Христов, и тако апостольское слово действенно есть и до ныне. Но горе миру от соблазн, да и нужда им быти по словеси Христову. да познани будут благочестивии и нечестивии вси, кои бодрствуют во истинне Христове, и стоят неподвижно в ней, и кои дремлют во прелести противнаго духа, и шатаются в той, и уклоняются в развращение, их же отведет Господь с творящими беззаконие. Мир же на вас благочестивых христианех, на всем израили будет во веки. А еже вопрошаеши о попех рукоположенных от прежних православных святителей, и соблазнившихся от Никона богоотступнаго прелести, инако жертву приносящих, и познавшеся паки по древнему служити начаша. и таковии подлежат суду священных правил, понеже не сопротивишася нимало прелести нововводным преданием. на то священник всяк рукополагается, яко законно страдати хощет по Златоусту, и добрыи пастырь душю свою полагает за овцы по евангелию. И оне неведуще мню, своего священническаго чина и достоинства. тако от простоты погрешиша все, и страха ради мучительских запрещении слицемериша вмале. и от таковых понужи мощно всяку святыню приимати, непорочнаго ради на них благословения, первых наших святых пастырей крещение и исповедь и причащение и прочая. Кроме же нужи никакоже от них, понеже слюбодействоваша в догматех. А лучше тех ныне и невозможно обрести праваго священства. О горе и увы, третие прийде на всю землю, иже под небесем. но надеяся на Христа истиннаго, не оставлен будет всяк правоверныи. Да и старыя ставленники коснувшеся агница неправеднаго по священномученнику Ипполиту папы Римскаго. Аще паки обратившеся ко истинней службе, и с таковым намерением держати начаша священство, яко и умрети за старое благочестие, а не предати паки. то от таковых достоит благословение приимати, и во всем сообщатися. Помянувше Петра верховнаго апостола, яко по отречении своем плака горко, прият Христом бысть, и апостольства не отлучен. И аще не с таковым обращением старыя попы по падении своем служат, но мыслят двоедушно, егда понуждени будут от отступников, к прелести новых догмат, второе и третие отступити хотят, паки вертящеся яко прах ветром в разуме своем, и в неигрателных играти смышляюще. То от таковых яко от Июды предателя чюждатися православным. яко на время веруют, а во время напасти отпадают. Ибо и апостол Христов Петр по покаянию своем не отвержеся паки, но и пострада и умре за Христа и веру Его, и душу свою положи за Христово стадо. И лучьше ни от кого же наставлятися, нежели от злаго водиму быти, по Златоусту Иоанну, на послание ко евреом беседа, 34. А которыя попы от Никона отступника ставлены, и от никониян после мору. паче же от 7174 году [от Рожества Христова 1666]. егда совершенно православие все отринуша, древьняго предания святых апостол, и богоносных отец, и оболгаша их льстивно и охулиша. нечестие же всякое прияша и оправдаша и укрепиша, и новоразвращенныя и богомерския книги, со многими неисчетными ересми в них похвалиша, и всех еретик, крещение римское, и священство их гнусное прияша. их же вси святии отцы наши прокляша, и от святыя церкви отметнуша. Понеже Рим всех ересей приятелище, и источьник всякаго нечестия, латынское мудрование богомерское. И тем отступлением своим, и с латыни сообщением, чюжи себе сотвориша архиерейства по священным правилом святых апостол, и богоносных отец седми вселенских соборов, и девяти поместным; и поставляемы от них попы и дияконы, несвященни суть по правилом, вси они отстуницы, сами еретицы глупии, и поставлении от них канонному суду подлежат и анафеме. и православным християном ныне не подобает их благословения приимати, и крещения ни молитвы, и в церкви с ними не молитися, ниже в домех. то есть часть антихристова полка, и от исполнения церковнаго самоволне отсекшеся. но от всепагубнаго сына геены, пагубнаго сосуда сатанина, явльшагося во свое время настоящее. о нем же вам изреку Никона еретика адова пса, злейшии и лютейшии паче всех древних еретик, иже быша под небесем, они бо аще и зли суть, но на благочестие не возмогоша. но сами спяти быша и падоша. Сей же положи всю вселенную пусту, и грады огнем неверия зажже. паче же богоборство воздвиже, и гонение велие, и благочестию кончание, сотворил антихрист темное, и все их действо и вера в прелести содержима суть и укрепляема, не любовию Святаго Духа, и не советом. но гордостию сатаниною, и мучением различным, в том им судия истинный Христос Бог наш. А отступление их указует Дух Святый истинный во Апокалипсисе 13, главе, по числу зверя 666. и книга О вере, 30, главе. И святыи Ипполит папа Римскии. о нем же выше речено. и той пишет в слове своем о страшном суде и о антихристе. за полторы тысящи лет и больше, Святым Духом провиде от ныне наченшемся времени. и рече о пастырех злых губящих души в та времена, будет злыи вождь, то есть неправедное священство. ныне сбысться, и агнец неправедныи титин. то есть жертва неправа в числе зверином, титин бо тоже 666. в числе состоит. Посем инии богословцы глаголют мнози. что в последняя времена Христовы веры не будет на земли, кроме в малых токмо останется, крыющихся в пустынях и в горах. И сего ради Христос Сын Божии, в последняя дни назад не оглядываися бегати повеле от прелести, поминая жену Лотову. И паки глаголет егда приидет Сын Человеческий, обрящет ли веру свою на земли, и на сие богословцы глаголют. толкуя, обрящет в малех. И паки рече Христос. Егда узрите мерзость запустение неправедное священство, и прелесть антихристова, на святом месте поставится, сиречь во олтари неправославная служба, еже и видим ныне збывшеся. А инаго уже отступления нигде не будет, везде бо бысть, последняя Русь зде, и то от часа сего на горшее происходити будет царьми нечестивыми. То суть рози антихристовы, ими силно дело все отступническое, без тех же немощно. два рога от земли исходяща виде Богослов един о тех есть. Вторыи же по нем будет пособитель же злу. А 10 рогов инде прежде быша по престатии греческаго царства. о них же пишет Ияков жидовин в книзе своей богословии, всяк верныи да внимает и испытает писание опасно, попросив от Вышняго помощи. А лжеучителие настоящаго века сего кони сатанины. их же виде Иоанн Богослов, главы у них яко лвовы, то есть рыскание их зверское являет, обтичют бо сушу и море, ища вернаго поглотити во прелесть свою. и в хвостах их жала. То есть учение их смертоносное. жало его же аще кто приимет прельщенныи от них, той жив не будет вовеки, умрет душею и телом. А хвост, то лесть знаменует их Прежде бо льстят и обманывают, потом же мучат неприемлющих в хвостах их жала пагубнаго, сиречь прелести учения их смертоноснаго. Того ради судиша богоноснии отцы каноны своими правилными, ничего от еретик не приимати, ни благословения ни молитвы. кого еретицы благословляют и молятся о ком. То Христос Сын Божий со святыми своими проклинает таковых, и отвращается гнусныя молитвы их, и даров ненавидит. И от тех приносимых жертвы, рече нечестивых мерзость Господеви. А еретицы и отступницы, аще кого проклинают и отлучают. и о тех сам Христос благословляет и омывает и милует, и вси святии Его похваляют таковаго, все Бог наш еретиком противно творит, и святии Его вси о том пространно пишут. Святыи Иосиф Волоцкой в книзе своей Просветитель в последних словах о еретической клятве. яко не последует им суд Божии, не токмо отступнической клятве. но аще и православной святитель не по правилом кого свяжет, сам связан будет от Христа, неправедное бо запрещение не вяжется у Бога. праведен Господь Бог наш, и несть неправды в Нем, правду возлюби, и правая виде лице Его, по пророку Давыду. И кроме бо отступления своего блудят, и беззаконнуют чрез правила святых апостол и богоносных отец, сами началнии и отступницы, не дверию внидоша во двор овчии, но тако яко татие суть и разбойницы по словеси Христову, прескочиша ограду священных правил. Попы бывше в миру, и растленно житие проходяще, тако бысть святая правила, отнюд отсекают их не быти епископом мирскому попу постригшемуся, ниже патрахили им прощают наложити, не токмо на архиерейство дерзати таковым. А они вси мирьстии попы бывше кроме малых, и каковы сами преступницы отеческих предании и законов, таковых же и в причет поставляюще, неискусных писанию простяков, воров же и пияниц, и гнусное житие от юности проходящих многих, и детям неискусным вручают страшное таинство, 9 лет. и менше в четцы и певцы поставляюще, и таковыми блудами исполниша церковь, и во олтари бо поп друг друга во афедрон несмыслено бесящеся. Оле скаредия церковнаго, и мерзости запустение, на святом месте стоящия, когда тако бысть у православных святителей, во дияконы 15 лет поставляют, а в попы 20 лет. оных и менше. А священная правила вся сия отмещут беззакония, и анафеме предают. вся рече кроме церковнаго предания содеянная и содеятися хотящая анафема 3-жды. И они слепыя вожди сами себя на всяк год проклинают в неделю православия, и то дело яко игру вменяют. глухия аспиды чтец бо и певец менше 15 лет отнюд не бывает по правилом. поддиякон 20 лет. диякон 25 лет поставляется. А менше того возраста не поп по правилом святых отец. Сия бо им подобаше исправляти, а не догматы отеческия превращати, да ослепи их сатана, и ум омрачил, не познати благаго во церкви, но паче беззаконие к беззаконию прилагают. и преподобным отеческим законом досаждают преступлением своим. Но паче Святому Духу хулу приносят, глаголавшему усты святых своих утвержающему предания. всяко бо пророчество книжное, по своему сказанию не бывает, ни бо волею когда бысть пророчество, но от Святаго Духа просвещаеми глаголаше Божии пророцы. человецы по божественному апостолу плакати достоит таковых продерзателей. яко сами бо не ведают что творят, да и весь народ с собою погубляют прелагатаи они злии. И не диво есть о них что тако творят волю дияволю. глаголет Иоанн Дамаскин, в слове своем на еретики, в 1-ю неделю поста. Егда бо рече, диявол хощет погубити человека, тогда первее ослепляет ему ум, да не познает благое. Тако и они ослеплени суть от древняго врага, и блудят без матери, и без пастыря Христа. На всяко лето себе переправливают, а в познание истинны никогда не приидут. Но от часу в горшее приходят нечестие. верным мучение прибавливати будут на всяк год и месяц и день и час, их бо година прииде и область темная. Зде есть терпение святых, явныя от никониян, жиды проявляются новыя. яко оный поп богоотступныи Сисой Нова града, что сослан бысть в Никонове разбойстве на Вологду, егда Петров посох приехав нощию в Москву, украде из церкви соборныя Никон. А тот поп бысть в шишах у татя церковнаго. и тут на Вологде пред множеством народа, глагола хулныя глаголы на Христа истиннаго Бога нашего, вором называя Творца небу и земли, по делу рече жиды Христа распяли за воровство Его, тако блядословяще скверный он поп поборник Никонов, паче же самого сатаны сын, ему же псу бешеному нестерпеша тут християне, хотяще его камением побити. он же яко волк убеже ко архиепископу на двор, к подобну себе врагу, и той укры его у себе в дому. А инии врази Христовы, друзи антихристовы: и в книгах предлагают грешным безгрешнаго Сына Божия нарицают сице. якоже Христос за своя согрешения распят бысть, тако и мы за своя согрешения распинаемся. А в старых святых книгах истинно стоит та речь, якоже бо Владыка Христос за наше согрешения распятся, тако и мы за своя согрешения распинаемся со страстми. в той же книге тако есть, умолчим зде до времени, и пождем праведнаго суда. Во время се ни царя ни святителя, един бысть православныи царь на земли остался, да и того не внимающаго о себе, западнии еретицы облацы, угасили християнское солнце, и свели во тму многия прелести, и погрузили да не вникнет на истинный свой первыи свет правды, увы увы бысть. и се возлюбленнии не явно ли антихристова прелесть, да внимаем себе сиречь отвсюду, и себе обзираем, и с нечестивыми себе не смешаем, путь бо нечестивых погибнет, и развращеннаго их учения не послушаем, да не осудимся с ними вечно от Христа и святых Его, отступницы бо и еретицы. Но бегаем от них, и крыем главу свою Христа, да не разлучимся с Ним вовеки. Аще бы они лукавии наставницы и житие свое имели непорочно, то не подобаше нам того испытовати по Златоусту Иоанну, и прочих святых. Аще же в вере погрешат, то бегай от них и отрицайся. Беседа ко евреом на послание 34. Приводит Златоуст Павлов глагол. Повинуйтеся наставником вашим и покаряйтеся, что убо рече, егда лукав будет, не повинуемся ли. лукава како глаголеши. Аще убо веры деля, то бегай его и отрицайся. не токмо аще человек будет. но аще и ангел с небеси сшед, и прочее. И паки Златоустый в 2-го к Тимофею нравоучении. Аще бо учение имать развращенно, аще ангел будет не повинуемся. Аще же право учит, не житию внимай, но глаголом. и прочая. Ниже. И что глаголю, ниже Павлу повиноватися подобает, аще нечто свое глаголет. Аще нечто человеческо. Но апостолу Христа имущему глаголюща в себе. Видесте ли братие в колику высоту дело веры возведе, крайнии учитель вселенныя божественныи Златоуст. зело в догматех церковных нам непоступным быти подобает, и блюстися еретическаго развращеннаго учения. Той же к галатом глаголет. Аще и мало что подвигнет анафема да будет. Тако бо проклинает святыи Златоуст всех еретиков и отступников, прелагающих пределы вечныя, яже положиша они отцы святии. А нынешнии отступницы не мало что в вере православной подвигнуша, но и вся догматы превратиша. И его священнаго Златоуста творение литоргию святую, и исказиша во многих местех. ово отъяша, а ово свое ухоботье вмещаше тут, и вся книги развратиша, и уставы церковныя инако, и чины премениша и таковым злохитрым лукавством своим отступническим, все исполнение российския церкви возмутиша. и всех православных християн в сумнение великое вложиша, гонение же и мучение на верных превелие воздвигоша, дабы ни един християнин явно был стараго благочестия. И се есть знамение настатия антихристова, готовят бо ему путь предотечи его. Того ради всяку церковную истинну изметают вон, да не обличен будет и опален от истинны Христовы, противник Христов, но на готовое место сед. и учнет последнюю прелесть свою простирати, и чюдеса творити привидением, якоже глаголют богословцы святии о нем. И того ради ныне раздвоение в людех, да познает пагубник кто Божии, и кто егов. кто ли держится преданнаго, и кто колеблется, да в тех слабых человецех, и век сей любящих, власть свою имать. Его же есть пришествие не просто, но по действу станину. Сказует апостол Павел, и может в погибающих, кои любви истинныя не прияша, во еже спастися им. да суд приимут вси неверовавшеи истинне, и прочее. Сего ради Бог послет им действо лсти. Тако же и попы на два чина разсеклися, студныя и мерския, как при Илии бысть вааловы жерцы. Что же студныя тогда быша, кои жертву Богу приношаху по закону данному им, и освящени суть Богу до Ахавля отступления. Егда же повеле Ахав жертву приносити Ваалу вместо Бога. Тогда они нечестиваго веления послушавше царева, и служаху Ваалу яко Богу. И сего ради студныя глаголются священники по отступлению, и сему подобни суть попы старых архиереов ставленники покинувше истинную службу отец своих, и наченше льстивую и развращенную приносити по новым служебникам еретическую жертву. Мерзския же вааловы жерцы, се есть кои к новой службе поставлени суть Ваалу, паче же бесом служити, и сего ради сии мерзския глаголются. овии студныя, овии же нечестивии суть, всех вкупе и мерзских и студных пси. един Илия святыи обличив, и ревности Божия исполнися, закла ножем аки свиней и новыя ставленники ныне от новых отступников мерских оных подобны, но иной службе поставлени, и сии обои неправи суть. духовным ножем святых отец ревностию отсекаются священства; Да понужди от старых рукоположенцов мощно благословение прияти, обратившихся паки на истинну, яко выше о сем рехом от православных поставлении. А от новых ставленников аще и по старому служат, отнюд не подобает благословение приимати по правилом, ни мало ни велико. Понеже от еретик поставлении неосвящени, но осквернени от рук их. Помяните при Златоусте бывших християн причетников и простых, аще и не о вере у них бысть тогда вражда и раскол, но неправеднаго ради изгнания Златоуста, Иоанновы ученицы великаго света, отнюд не восхотеша врагом Иоанновым сообщатися и комкати, от арсаковы и от тиковы части. Аще и царевыми законы принуждаеми, мнози от них того ради и до смерти пострадаша, и к собором их не присташа. и за сие токмо с мученики причтошася, добрыя овцы за благаго пастыря душю свою положиша, а он за них. Зрите же аще за святаго мужа християне правии пострадаша и венчашася светло. А нынешнии отступницы самого Сына Божия гонят и хулят, и святых Его предания отмещут многая, и пресвятую Матерь Христову воистинну Богородицу, безчестят во многих местех новых книг, а не единаго Златоуста. И како нам к таковым врагом Божиим сообщатися ныне, не буди то. А иже глаголют нецыи слабострастнии человецы, от противных и верных безумныя глаголы, апостольское вещание ко евреом сие. Понужи и закону пременение бывает, и сим апостольским гласом слабость свою и отступление подпирающе, и законы Христовы многия, и апостольския и отеческия превращающе, льстяще блудную свою мысль сим словом, не ведуще разума апостольскаго отнюд, ни силы его. Сие рече апостол избранныи сосуд Христов, о июдейском предшедшем священстве и законе их, на время данном им до Христа Исуса. И начало тамо речи сие есть. Прелагаему священству понужи и закону пременение бывает, сице понеже Аароново священство ветхаго завета преста. егда Христос архиерей грядущих благ прииде и воплотися от Пресвятыя Девы, и егда священство их преста, тогда закон Моисеов пременил Христос, на свой благодатныи закон новыи. Тако безсловесная животная закалаху архиерей, на жертву овцы и волы и птицы, зде же Христос сам изволи закалаем быти нашего ради спасения словесный Агнец. Ветхое же упраздни священство и закон порочныи. Той же апостол глаголет к жидом тамо, аще бы рече первыи закон непорочен был, не бы второму искалося место, тем же отъемлем первое, да второе поставит. И инде рече Павел, древняя мимо идоша, и се быша вся новая. И Богослов Иоанн глаголет, закон Моисеов дан бысть, благодать и истинна Исус Христом бысть. благодать есть и истинна апостольскаго разума закона ветхаго пременение, а не о догматех веры Христовы то речено бысть, и не о апостольских и отеческих преданиих. За то бо должно есть всякому християнину страдати и умирати, а не пременяти и не предавати. Слышите апостола о догматех правых како глаголет страшно. Аще рече ангел инако благовестити вам будет, анафема есть. Не токмо человека проклинает, но и ангела. Сия слышавше опасно разумеем писание, что о чем глаголет, неведание бо ереси породило, неведение церкви превратило, неведение всех ересей злее по Златоусту. Глаголет же Исидор Пилусит о кривотолкующих писание по своему разуму, и нехристиянех наричет сице, яко ниже во християнех сим быти. Праведно бо было, иже тако на священная досаду наносящим по писанию, и в неигрателних играющих и прочая. Аще кто не верит моим словесем, и отречение ему растешет бо его Христос полма, и часть его к неверными приложит, аминь.

Мир тебе брате, и сущим всем с тобою, тако о Христе мудрствующим, да помолитеся и о нас. Писано бо есть исповедайте друг другу согрешения, и молитися друг за друга, яко да исцелеете, сиречь здравы будите, ныне и присно и вовеки веком, аминь.

Да простите молю в бедности, писано скорым делом и без книг, токмо что Христос подал. И где аще кое слово не так написано не напротив книг, и вы собою исправте. А богомудраго старца Спиридония преподобнаго слова на еретики, приемлите как и прочих богословцев святых Григория, и Василия, и Дамаскина Иоанна, и иных, Той же истинныи Параклит глагола в нем. Отец бо Спиридонии и пророк бысть, что он говорил про собор отступничей, тако и збыстся все, и на мне его пророчество збысться не едино что преставляяся глаголал мне. чюден муж делом и словом и в премудрости, и инаго таковаго ныне несть.

У подлиной епистолии по край ея и рука приложена, преосвященнаго Аввакума протопопа, сию протопоп Аввакум чел, и сие разумел истинно, и к тому и руку приписал. Сия дозде, аминь.

Сие послание отца священнаго диякона Феодора, чернец Авраамии прочет, и любезно целовав, и рукою своею подписал, яко хотящим спастися, тако достоит веровать воистинну. О Спиридонии же сами разумевайте прочитая его писания.